Fama Fraternitatis

Fama Fraternitatis

Ова е клучниот документ на кој е заснован Розенкројцерскиот феномен. Прво беше издаден на германски во 1614 e.v., потоа во 1615 на латински, иако постојат некои манускрипти кои датираат од 1611.

На Мудриот и Упатен Читател

Мудроста (рече Соломон) за човека е бескрајно Богатство, зашто таа е Здив на Божјата Моќ и чисто Влијание кое истекува од Славата на Семоќниот; таа е Сјај на Вечната Светлина и неизвалкано Огледало на Божјата Величественост и Одраз на неговата Добрина; таа не поучува на Присебност и Претпазливост, Праведност и Сила; таа го разбира Лукавството на зборовите и Решението на нејасните реченици; таа ги предвидува Знаците и Чудата и она што ќе се случи во иднината; со ова Богатство нашиот прв Татко Адам беше надарен: следствено на тоа кога Бог ги доведе пред него Ѕверовите земни и Птици Небесни, тој на секое од нив им даде соодветно име во согласност со нивната природа.

Иако сега преку тажниот пад во грев се изгуби овој извонреден Бисер, Мудроста, и дојде само Темнина и Незнаење во Светот, сепак Господ понекогаш ја подаруваше и манифестираше истата на некои од неговите Пријатели: самиот Крал Соломон е сведок за ова, зашто тој со искрена молитва и желба ја здоби таквата Мудрост од Бога, со чија помош знаеше како беше создаден Светот и ја сфати Природата на Елементите, исто и времето, неговиот почеток, средина и крај, зголемувањето и намалувањето, промените на времињата во текот на целата година, Промените во Годината и Заповедта на Ѕвездите; тој ги разбра, исто така, одликите на питомите и дивите Ѕверки, причината за беснеењето на Ветровите, умовите и намерите на луѓето, сите видови и природи на Билките, доблестите на Корењето, сите тие и сличните на нив не му беа непознати. Не мислам дека може да се најде некој кој нема да посака со сето свое срце да биде Соучесник во ова благородно Богатство; но бидејќи увидовме дека оваа Среќа не може да му се случи на некој, освен ако самиот Бог не даде Мудрост и го испрати својот свет Дух одозгора, затоа ја отпечативме оваа мала Расправа, односно Famam & Confessionem, за Славното Братство на Розиниот Крст, да биде прочитана од секого оти ним им е јасно покажано и откриено што ќе го очекува Светот.

Овие работи можеби ќе изгледаат необични и многумина може ќе ги сметаат дека се само Филозофска парада, а не вистинска Историја која е објавена и кажана за Братството на Розиниот Крст; доволно ќе се покаже во нашата Исповед дека во она што следува има повеќе отколку што може да се замисли; и лесно ќе биде сфатено и согледано од секој (освен ако не е лишен од разбирање) она што се однесува и мисли на денешниве времиња.

Оние кои се вистински Ученици на Мудроста и вистински Следбеници на Сферичната Уметност подобро ќе ги разгледаат овие работи и високо ќе ги ценат и ќе просудат за нив сосема поинаку од другите исто како што направија некои важни Луѓе, особено Адам Хезлмаер, Notarius Publicus на Надвојводата Максимилијан, кој на сличен начин направи извадок ex scriptis Theologicis Theophrasti и напиша Расправа потпишан како Езуит каде што посака секој Христијанин да биде вистински Езуит т.е. да чекори, да биде, да живее и да остане во Исус: Тој беше лошо награден од Езуитите бидејќи во неговиот одговор напишан за Famam тој ги именува и призна членовите на Братството на Розиниот Крст како високо илуминирани луѓе и непоколебливи ‘Езуити’; не можејќи да го истрпат тоа тие го уапсија и го ставија во затвор, а за тој чин ќе си ја добијат својата награда.

Благословената Аврора потоа ќе почне да се појавува (по поминувањето ба темната Ноќ на Сатурн) со нејзиниот сјај, кој сосема ќе го угасне сјаењето на Месечината, или тоа се мали Искри на Небесна Мудрост кои се уште се останати кај луѓето и таа е Претходничка на милиот Фебус, кој со неговите бистри, огнени и блескави Зраци го носи тој благословен Ден што е долгоочекуван од луѓето со чисто срце; од таа Дневна светлина тогаш вистински ќе бидат спознаени и видени сите небесни Богатства на побожна Мудрост, како и Тајните на сите скриени и невидливи работи во Светот, во согласност со Доктрината на нашите Предци и древни Мудреци.

Ова ќе биде вистински кралски Рубин и црвено блескав скапоцен камен за кој е речено, Оној што сјае и дава светлина во ноќта и кој е совршен Лек за сите несовршени Тела и кој ги менува во најдобро Злато, и кој ги лекува сите Болести, ослободувајќи ги од сите болки и неприлики. Затоа мил Читателу обрати внимание и почни заедно со мене искрено да се молиш на Господа за да се смилостиви и да ги отвори срцата и ушите на сите неупатени луѓе и да им го подари својот благослов, за да можат да ја спознаат неговата Омнипотентност со восхитувачката контемплација на Природата, во негова чест и слава и за љубов, помош, утеха и зајакнување на нашите Ближни и за оздравување на сите болни.

Fama Fraternitatis
или
Откритието на Братството на најпофалениот Ред
на Розин Крст

Гледајќи дека единствениот Мудар и Милостив Бог во последно време ја дари обилно неговата милост и добрина на Човештвото, со чија помош ние го достигнуваме се повеќе и повеќе совршеното знаење на неговиот син Исус Христос и Природата, со право можеме да се фалиме за среќново време во кое не само што ни е откриен половина Свет, кој досега беше непознат и скриен, ами тој исто така ни манифестира многу прекрасни и досега невидени Работи и Суштества од Природата, уште повеќе тој издигна луѓе надарени со голема Мудрост кои можат делумно да ги обноват и сведат сите Уметности (во нашево време непрочистени и несовршени) до совршенство; за да може на тој начин Човекот да ја сфати сопствената Возвишеност и Вредност и зошто е наречен Микрокосмос и колку далеку неговото знаење се протега во Природата.

Простиот Свет на кажаново малку ќе биде задоволен и повеќе ќе се смее и потсмева; исто Гордоста и Алчноста на Учените е толку голема што не им допушта да се сложат заедно; но ако беа здружени тие ќе можеа од сите работи кои во нашево Време Бог обилно ни ги дари, да соберат Librum Naturae или совршен Метод за сите Уметности; но таква е нивната опозиција што тие се држат до традицијата и се неволни да го напуштат стариот курс, ценејќи го Порфириј, Аристотел и Гален, да, и она што само е обична парада на знаења, повеќе од јасно манифестираната Светлина и Вистина; ако горенаведените беа живи со голема радост ќе ја напуштеа нивната погрешна Доктрина. Меѓутоа, овде има многу слабости за да се преземе едно вакво големо Дело; иако во Теологијата, Медицината и Математиката Вистината се спротивставува на самата себе; сепак стариот Непријател со неговата вештина и суптилност делува на тој начин што ја попречува секоја добра цел со помош на неговите Средства и со кавгаџиските колебливи луѓе. За една ваква цел на општа Реформација, најпобожниот и најилуминираниот Татко, нашиот Брат C.R., Германец, лидер и зачетник на нашето Братство многу долго работеше, кој заради неговата сиромашност (иако имаше Благородничко потекло) во петтата година беше сместен во Манастир каде научи добро Грчки, Латински (заради неговата искрена желба и барање) и во младешките години беше поврзан со Братот P.A.L., кој одлучи да оди во Светата Земја.

Иако овој Брат умре во Кипар и никогаш не дојде во Ерусалим, сепак нашиот Брат C.R. не се врати, туку отплови со брод во Дамаск мислејќи да продолжи оттаму до Ерусалим; но заради слабост на неговото тело остана таму и заради неговите вештини во медицината стекна голема наклоност од Турците; Во меѓувреме случајно се запозна со Мудрите луѓе од Дамаск во Арабија и согледа какви големи Чуда тие прават и како им беше Природата ним откриена; притоа големиот и возвишен Дух на Братот C.R. толку се восхити што Ерусалим веќе не му беше во умот, како што му беше Дамаск; тој не можеше веќе да се воздржи и направи договор со Арапите да го пренесат за одредена сума пари до Дамаск; тој имаше само шеснаесет години кога стигна таму, но беше со силна Холандска градба; таму Мудреците го примија (како што самиот сведочеше) не како странец, ами како некој што долго го очекуваа, го викнаа на име и му покажаа други тајни надвор од неговиот Манастир, при што тој не можеше а да не се изначуди.

Таму тој го научи добро Арапскиот Јазик, па така следната година ја преведе Книгата М на Латински, кој потоа ја зеде со себе. Овде тој ја научи неговата Медицина и Математика на кои светот штотуку почна да им се радува, само кога би имало повеќе Љубов, а помалку Завист. По три години имаше љубезна согласност и повторно се врати, па отплови преку Синус Арабикус во Египет каде не остана долго, туку само направи подобро набљудување на Билките и Животните; го преплови Медитеранското Море за да дојде до Фез каде што всушност беше упатен од страна на Арапите. И е голема срамота за нас, што мудрите луѓе, кои се толку оддалечени едни со други, не само што имаат исто мислење, и ги мразат спорните Писанија, ами исто така се и спремни под печатот на тајноста да ги пренесат своите тајни на другите.

Секоја година Арапите и Африканците разменуваат луѓе и се испитуваат меѓусебно за нивните Науки за да видат дали се имаат откриено некои подобри работи или дали Искуството им го ослабело Разумот. Годишно се открива по нешто и на тој начин Математиката, Медицината и Магијата (во нив оние од Фез се највешти) се подобруваат; денес во Германија учените Луѓе, Магичари, Кабалисти, Лекари и Филозофи не се бараат меѓу себе, ех кога би имало повеќе љубов и љубезност меѓу нив или кога поголемиот дел од нив не би ги криел тајните само за себе. Во Фез тој се запозна со оние што вообичаено се нарекуваат елементарни Жители, кои му открија многу од своите тајни. Исто и ние Германците ќе соберевме заедно многу работи ако имаше слично единство и желба за споделување на тајните. За овие од Фез честопати признаваме дека нивната Магија не е доволно чиста исто дека нивната Кабала е загадена со Религија; но сепак тој знаеше добро како да ги искористи двете и пронајде уште подобра основа за својата Вера, целосно во согласност со Хармонијата на сиот Свет и прекрасно врежана во сите временски Периоди, и оттаму произлезе таа убава Сложност, како што во секоја јатка се крие дрво или плод така и во малото тело на Човекот се содржи целиот голем Свет, чија Религија, политика, здравје, делови, природа, јазик, зборови и дела се во подеднаква согласност и хармонија со Господ, Небото и Земјата; а она што не се согласува со нив е грешка, лага и му припаѓа на Ѓаволот, кој е единствената прва, средна и последна причина за борбата, слепилото и темнината во Светот. Ако некој би можел да ги испита сите па и неколку луѓе на Земјата ќе открие дека она што е добро и правилно секогаш се согласува само по себе; а се останато е извалкано со илјада грешни вообразувања.

По две години Братот R.C. го напушти Градот Фез и исплови со многу скапоцени работи во Шпанија откако толку добро и корисно го помина времето во патувања надевајќи се дека учените во Европа многу ќе се израдуваат со него и ќе започнат да ги управуваат и подредат сите Науки во согласност со оние здрави и сигурни Основи. Така, тој разговараше со Учените од Шпанија и им ги покажа Грешките на нашите Науки и како тие можат да се поправат и откаде да ги добијат вистинските Навестувања за идното Време, а каде треба да се усогласат со минатото; исто така како треба да се поправат грешките на Црквата и целокупната Морална Филозофија. Тој им покажа нови достигнувања, нови плодови и ѕверови и им препиша нови Аксиоми (Axiomata) со помош на кои сите работи можат целосно да се обноват. Меѓутоа, за нив тоа беше смешна работа; и бидејќи беше нова тие се плашеја дека нивните големи Имиња можат да се компромитираат ако сега почнат одново да учат и ако ги признаат повеќегодишните Грешки на кои беа свикнати и од кои добија многу. Оној кој сака вознемирувања нека се реформира.

Истата песна ја слушна и од другите Нации, а тоа го погоди (наспроти неговите очекувања) зашто беше спремен обилно да им ги пренесе сите негови Науки и Тајни на Учените, ако сакаа само да ги запишат вистинските и непогрешливи Аксиоми, кои се надвор од сите Вештини, Науки и Уметности и целата Природа, зашто она што го знаеше можеше да ги насочи како Небесна Топка или Круг до единствената средишна Точка и Centrum и (како што е вообичаено кај Арапите) тоа ќе им служи на мудрите и учените да Владеат, и ќе има Друштво во Европа кое ќе има доволно Злато, Сребро и скапоцени Камења за да им даде на нашите Кралеви за нивните неопходни потреби и законски оправдани цели; преку кое идните Владетели можат да се одгледаат и научат се што Господ му дозволи на Човек да знае и за да бидат оспособени во сите нужни времиња да им даваат совет и на оние што бараат како Паганските Оракулуми. Навистина мора да признаеме дека светот во тоа време беше позрел со сите големи немири и работеше да се спаси од нив; и роди со болка достојни луѓе кои се бореја со сета сила против Темнината и Варварството и не оставија нам, нивните наследници да ги следиме; и сигурно тие беа горната точка in Trygono igneo, чиј пламен сега треба да биде уште посјаен и несомнено на Светот ќе му ја даде последната Светлина.

Сличен ваков беше Теофраст по Професија и по Способности, иако не беше член на нашето Братство, сепак тој грижливо ја прочита Книгата М со помош на која беше издигнат неговиот продорен ingenium; но овој човек беше, исто така, попречен во неговиот пат од мноштвото учени и божемни мудреци, така што не можеше мирно да го сподели со другите своето Знаење и Разбирање за Природата. Заради тоа во неговите списи тој повеќе и ги исмеваше овие работни групи и не им ја откри својата вистинска природа; како и да е во него престојуваше гореспомнатата Хармонија, која без сомнение тој им ја предаде на Учените да бидат воведени во големите Уметности и Науки, а ако не беа подложни на суптилна вознемиреност тој безгрижно и слободно ги игнорираше и ги препушташе да се предадат на своите будалести задоволства.

Да се навратиме на нашиот возљубен Татко и Брат C.R., кој по многу мачни Патувања и по неговите неуспешни вистински Поучувања се врати повторно во Германија, која (заради промените кои наскоро се случија и поради чудни и опасни ставови) силно ја сакаше. Таму иако можеше да се фали со неговите Вештини, особено со трансмутациите на Метали, сепак тој повеќе го ценеше Небото и неговите Жители, Луѓето, повеќе од сета суетна слава и помпезност.

Во секој случај тој изгради погодно и уредно живеалиште во кое размислуваше длабоко за своето Патување и Филозофија и ги претвори обете заедно во вистински Споменик. Во оваа куќа помина многу време со Математиката и направи многу фини Инструменти ex omnibus hujus artis partibus, од кои малку ни преостанаа, како што ќе разбереш подоцна. По пет години кај него повторно се јави желба за Реформација и во однос на тоа тој се сомневаше во помошта од другите, иако самиот беше нестрплив, неуморлив и упорен тој заедно со неколку придружници го презеде тој план: притоа за таа цел од неговиот прв Манастир (кон кој имаше голема приврзаност) повика тројца од неговите браќа, Братот Г.В., Братот Ј.А. и Братот Ј.О., кои имаа повеќе знаење за Науките од кој било во тоа време и ги обврзаа тројцата на верност, трудољубивост и тајност; исто да се посветат грижливо и да го запишат сето она на што ќе ги упати и поучи за да не згрешат ниту за слог или збор при примањето на идните членови во Братството, кое ќе се изведе преку посебно Откровение.

На овој начин започна Братството на Розиниот Крст; најпрво само со четворица и тие го направија Магискиот Јазик и писмо со голем Речник, кој секојдневно го користиме во знак на Божје величење и слава и таму наоѓаме голема мудрост; исто така, тие го направија првиот дел од Книгата М; но бидејќи работата беше многу тешка мноштвото болни ги попречуваа и новата градба (наречена Sancti Spiritus) беше сега завршена, тие одлучија да повлечат и примат уште луѓе во нивното Братство; за оваа цел беше одбран братот R.C., неговиот братучед од починат чичко, братот Б, вештиот Сликар G, и P.D. нивниот Секретар. Сите тие беа Германци, освен братот J.A. и вкупно беа осум на број, сите ергени заколнати на невиност и тие собраа книга или том за се она што човек ќе го посака и замисли.

Иако сега слободно тврдиме дека Светот е доста подобрен за сто години, сепак сме сигурни дека нашите Axiomata ќе останат непроменливи до Крајот на Светот, а светот во своето највисоко и последно Доба нема да достигне ништо повозвишено од нив; зашто нашето Рота го има својот почеток од денот кога Господ рече Fiat и ќе заврши кога ќе рече Pereat; сепак Божјиот часовник отчукува секоја минута, онаму каде нашите мани ни трошат цели часови. Ние, исто така цврсто веруваме дека ако нашите Браќа и Татковци живееја во сегашново време тие погрубо ќе се справеа со Папата, Мухамед, Писарите, Артистите, Софистите и ќе се прикажеа во појасно светло, а не само со воздишки и желба за нивен крај.

Значи овие осум Браќа ги распоредија и припремија сите работи на таков начин што немаше потреба од некоја голема работа, исто така секој од нив беше доволно упатен и способен совршено да расправа за тајните и да ја манифестира Филозофијата. Тие се согласија да не остануваат заедно повеќе и се договорија како на почетокот да се разделат во неколку Земји како би можеле нивните Аксиоми подлабоко да бидат студирани од учените во тајност, а и за да можат да забележат во некоја Земја нешто или ако согледаат Грешка да се известат еден со друг.

Нивниот договор беше следен:

1. Ниеден од нив нема да прави ништо друго, освен да лекува болни и тоа гратис.
2. Никој од потомците да не биде ограничен да следи само одреден вид на обичај, ами ќе ги следи обичаите од Земјата.
3. Секоја година на денот C тие ќе се сретнат заедно во куќата S. Spiritus, или да ја напишат причината за отсуството.
4. Секој Брат ќе гледа да најде достојна личност, која ќе го замени по неговата смрт.

5.Зборовите C.R. треба да се нивен Печат, Знак и Одлика.
6. Братството ќе остане тајно сто години.

На овие 6 точки браќата меѓусебно се обврзаа да ги чуваат; и пет од Братството се разделија само Браќата B и D останаа со Таткото Fra: R.C. цела година, а потоа и тие на сличен начин се разделија, па по нив му се придружија неговиот роднина и Братот J.O. и така тој имаше со него двајца Браќа во текот на целиот живот. И покрај тоа што Црквата се уште не беше прочистена, сепак знаеме дека тие мислеја на неа и со големи копнежи се грижеа за неа. Секоја година се собираа со радост и правеја преглед на сработеното; сигурно имаше големо задоволство кога се слушаа вистински и неизмислени Чуда, кои Господ ги излил насекаде низ Светот. Секој може да биде сигурен дека токму вакви личности беа пратени и здружени заедно од Господ и Небото и избрани од најмудрите луѓе што живеел во многу Векови и дека навистина живееја заедно во најголема Слога, најголема Тајност и најголема Љубезност.

Тие навистина водеа живот достоен за пофалба; иако беа поштедени од сите болести и маки, сепак не можеа да го надминат времето што им беше од Бога одредено. Првиот што умре од Братството и тоа во Англија беше J.O. како што му претскажа Братот C долго пред тоа да се случи; тој беше голем експерт и многу упатен во Кабалата како што сведочи неговата Книга наречена H. Во Англија за него многу се зборува особено затоа што го излекува младиот Ерл од Норфолк од Лепра. Тие одлучија нивните погребни места да се чуваат во тајност и ден денес не ни е познато што се случи со некои од нив, сепак нивните места во Редот беа заменети со соодветни наследници; но ова ќе го кажеме јавно сега присутни во слава на Бога дека иако научивме многу тајни од Книгата М (иако пред нашите очи ја имаме сликата и шемата на целиот свет) сепак не ни се покажани нашите несреќи, ниту смртниот час, кој му е познат само на Бога и на тој начин не чува во постојана спремност; но за ова повеќе има во нашата Исповед каде излагаме 37 Причини заради кои го откриваме нашето Братство и ги нудиме нашите виши Мистерии слободно без ограничување и надоместок; исто така нудиме повеќе злато отколку што му донесоа двете Индии на Шпанскиот Крал; зашто Европа има дете и ќе донесе на свет силно дете, кое ќе излезе во пресрет на дарот од големите кумови.

По смртта на I.O., Братот R.C. не мируваше и ги повика останатите (и како што претпоставуваме), па тогаш беше направен неговиот гроб; иако сега ние (последните) не знаеме кога умре нашиот возљубен татко R.C., и ги имаме само имињата на првите браќа и сите нивни наследници; сепак до нас стигна тајна, која преку нејасни и скриени зборови и говори од 100 години, братот A, наследникот на D (кој припаѓаше на вториот и последен ред на наследници и кој живееше меѓу повеќето од нас) ни ја предаде нам кои сме од третиот ред на наследници; инаку мораме да признаеме дека по смртта на гореспомнатиот А никој од нас не знаеше нешто за Братот R.C. и неговите први браќа, освен она што беше останато од нив во нашата Филозофска Библиотека во која нашите Аксиоми се сметаат за главни Rota Mundi, како препишани дела, и Protheus како најкорисен. На сличен начин не знаеме со сигурност дали некои од вториот ред наследници беа со слична мудрост како првите и дали тие беа воведени во сите тајни работи. Овде, исто така, ќе му биде објавено на благородниот читател не само она што го слушнавме за погребот на R.C., тука и за она што јавно беше манифестирано со предвидувањето, страдањето и наредбата на Бога, кому најверно му се поклонуваме и ако не прашаат дискретно и во Христијански дух нема да се плашиме да ги објавиме јавно во Печат нашите имиња и презимиња или што било што ќе се побара од нас.

Вистинската и фундаменталната врска со откритијата за еден од најпросветлените луѓе на Бога, Братот C.R.C. е следна; откако братот А почина во Gallia Narbonensi неговото место го зазеде нашиот Брат N.N. и откако не заветува со свечена заклетва и тајност не информира бона фиде дека А му дал утеха со тоа што му кажал оти нашето Братство нема за долго да биде во тајност ами ќе биде од помош за целата Германска Нација и потребно и величано; а за тоа тој нема воопшто да биде навреден во неговата држава. Следната година откако го припремил правилно своето Школо планирал да патува, бидејќи за таа цел среќно биле обезбедени доволно средства (а бидејќи бил добар Архитект) и решил да промени нешто од неговата куќа за да ја направи посоодветна; при тоа обновување налетал на Меморијалната Плоча направена од месинг и која ги содржела сите имиња на браќата и некои други работи; тоа планирал да го пренесе во друга поприкладна гробница; зашто каде и кога Fra: R.C. умре и во која земја беше закопан ние не знаевме, зашто тоа беше скриено од нашите претходници. Во таа Плоча имаше цврст клин, кој кога ќе се повлечеше силно повлекуваше со себе еден неважен голем камен од тенкиот ѕид или малтер од тајна врата и така ја отклучуваше скриената врата; потоа со радост и копнеж го турнавме остатокот од ѕидот и ја расчистивме вратата над која со големи букви пишуваше Post 120 anno patebo, со годината Божја под натписот; тогаш му се заблагодаривме на Бога и тука запревме таа ноќ, зашто прво сакавме да ја консултираме нашата Рота; ние повторно се навраќаме на нашата Исповед и кажуваме дека она што е овде публикувано е за помош на оние кои се достојни, а за недостојните (Божја желба) ова нема да има голема корист. Исто како што беше нашата врата чудесно откриена по многу години, така ќе се отвори врата за Европа (кога ѕидот ќе се отстрани) која веќе се покажува и со голема желба се очекува од многумина.

Следното утро ја отворивме вратата и пред нашите очи се појави гробница со седум страни и ќоша, секоја страна пет стапки широка, а височината беше осум стапки; иако Сонцето никогаш не свети во оваа Гробница, сепак таа беше огреана од друго сонце, кое го имаше стекнато тоа од Сонцето, и беше сместено во горниот средишен дел на таванот, наместо надгробен камен имаше кружен Олтар покриен со месингана плоча, а на неа беше изгравирано; A.C. R.C. Hoc universi compendium unius mihi sepulchrum feci.

Околу првиот Круг или Раб стоеше Jesus mihi omnia.

Во средината четири фигури затворени во кругови имаа натпис

1. Nequaquam vacuum.
2. Legis Jugum.
3. Libertas Evangelij.
4. Dei gloria intacta.

Сето ова беше чисто и јасно исто и седмата страна и двата Хептагони; така клекнавме долу и му се заблагодаривме на единствениот мудар, моќен и вечен Бог, кој не научи повеќе отколку што би можела сета човечка мудрост, величано нека е неговото свето име. Оваа Гробница се делеше на три дела, горен дел или таван, сид или страна и под.

За Горната страна нема многу да разбереш сега, само дека беше поделена според седумте страни во триаголникот кој беше во самиот центар; а што имаше таму само со Божја волја (оние што го сакаат нашето Братство) ќе го согледаат истото со свои очи; секоја страна или ѕид е поделена на десет квадрати, секој со по неколку фигури и реченици како што се вистински покажани и изнесени Concentratum овде во нашава книга.

Дното на сличен начин е поделено на триаголник, но бидејќи таму е опишана моќта и власта на нижите Владетели нема да го опишеме тоа, зашто се плашиме дека може да се злоупотреби од злобниот и расипан свет.

Меѓутоа, оние кои се снабдени со небесен Антидот, тие можат без страв и повреда да чекорат и да ја смачкуваат главата на старата и злобна змија, за која е погодно ова наше сегашно време; секоја страна или ѕид има врата за посебен сандак каде се наоѓаат разновидни работи, посебно важни се нашите книги, кои и покрај тоа ги имаме, освен Речникот на Theoph: Par. Ho, исто и оние сегашни книги кои сме ги напишале, а кои не се фалсификувани. Овде исто така, го најдовме неговиот Итинерарум и витам откаде што произлезе и овој спис во најголемиот дел. Во друг сандак имаше очила со разни одлики, во трет мали ѕвона, лампи и прекрасни напишани Песни; главно сето тоа беше направено во случај да не се загрози Редот и за да би можело и по стотици години да се обнови со нивното пронаоѓање во Гробницата.

Бидејќи се уште го немавме откриено мртвото тело на нашиот внимателен и мудар татко го тргнавме Олтарот настрана, па ја подигнавме тешката месингана плоча и го најдовме убавото и вредно тело, цело и нераспаднато како што е истото овде живо репродуцирано со сите Украси и Одежди; во неговата рака држеше книга на пергамент наречена I (И), која заедно со Библијата е нашето најголемо богатство врз која светот треба да има ограничен пристап. На крајот од оваа книга се наоѓаше следнава Пофалба Granum pectori Jesu insitum.

C. Ros. C. ex nobili atque splendida Germaniae R.C. familia oriundus, vir sui seculi divinis revelationibus subtilissimis imaginationibus, indefessis laboribus ad coelestia, atque humana mysteria; arcanave admissus postquam suam (quam Arabico, & Africano itineribus Collegerat) plusquam regiam, atque imperatoriam Gazam suo seculo nondum convenientem, posteritati eruendam custo divisset et jam suarum Artium, ut et nominis, fides acconjunctissimos herides instituisset, mundum minutum omnibus motibus magno illi respondentem fabricasset hocque tandem preteritarum, praesentium, et futurarum, rerum compendio extracto, centenario major non morbo (quem ipse nunquam corpore expertus erat, nunquam alios infestare sinebat) ullo pellente sed spiritu Dei evocante, illuminatam animam (inter Fratrum amplexus et ultima oscula) fidelissimo creatori Deo reddidisset, Pater dilectissimus, Fra: suavissimus, praeceptor fidelissimus amicus integerimus, a suis ad 120 annos hic absconditus est.

Под него беа потпишани

1. Fra: I.A. Fr.C.H. electione Fraternitatis caput.
2. Fr: G.V. M.P.C.
3. Fra: R.C. Iunior haeres S. spiritus.
4. Fra: B.M. P.A. Pictor et Architectus.
5. Fr: G.G. M.P.I. Cabalista.

Secundi Circuli.

1. Fra: P.A. Successor, Fr: I.O. Mathematicus.
2. Fra: A. Successor, Fra. P.D.
3. Fra: R. Successor patris C.R.C. cum Christo triumphant.

На крајот беше напишано:
Ex Deo Nascimur, in Jesu morimur, per spiritum sanctum reviviscimus.

Во тоа време веќе беше мртов Братот I.O. и Fra: D, но каде да се најде нивното погребно место? Не се сомневаме дека нашиот Fra: Senior ги имаше заедно со една посебна работа поставена во Земја и која веројатно беше скриена; исто така, се надеваме дека овој наш Пример ќе ги поттикне другите посилно да ги истражуваат нивните имиња (кои веќе ги објавивме) и да го бараат местото на нивниот погреб; бидејќи повеќето од нив заради нивната практика и медицина се уште се познати и величани кај многу старите луѓе; па така можеби нашата Газа ќе се зголеми или барем подобро ќе се прочисти.

Што се однесува до Minutum Mundum ја најдовме зачувана на друг мал Олтар, кој беше навистина многу пофин отколку што може да се замисли од некој упатен човек; но ќе го оставиме неопишан се додека не ни биде вистински одговорено на оваа искрена Famam; па така повторно го покривме со плочи и го поставивме олтарот, ја затворивме вратата и ја обезбедивме со сите наши печати; покрај тоа по инструкција и налог на нашата Rota се појавија на видело некои книги во кои е содржано M (кој беа направени за време на домаќинска грижа од достојниот за пофалба M.P.) Конечно се разделивме еден од друг и ги оставивме природните наследници да ги чуваат нашите Скапоцености. Така ги очекуваме одговорите и мислењата на учените и неучените луѓе.

Како и да е, знаеме дека по некое време ќе следи општа реформација и на небесните и на човечките работи во согласност со нашите желби и очекувањата на другите; зашто е подобро пред изгревањето на Сонцето да се појави Аврора или некоја бистрина или божествена светлина на небото; а во меѓувреме неколкумина што ќе ги дадат имињата ќе можат да се придружат за да го зголемат бројот и респектот на нашето Братство и да го направат среќен очекуваниот почеток на нашите Филозофски Канони кои ни се препишани нам од страна на нашиот брат R.C. и да бидат соучесници со нас во нашите богатства (кои никогаш не можат да пропаднат или да се потрошат) со сета понизност и љубов да бидат ослободени од световните маки и да не чекорат слепо во знаењето за прекрасните Божји дела.

За да знае секој Христијанин на која Религија и припаѓаме ние признаваме дека го имаме знаењето на Исус Христос (како што во денешно време главно во Германија се поучува чисто и незагадено од секакви залутани луѓе, еретици и лажни Пророци) во одредени значајни Земји се одржува, брани и пропагира. Исто така, користиме два Сакраменти како што се воспоставени со сите Форми и Церемонии уште од првата обновена Црква. Во Политиката ја признаваме Римската Империја и Quartam Monarchiam за наш Христијански лидер; иако знаеме какви промени претстојат посакуваме да им ги пренесеме сите со сето наше срце на другите добри и учени луѓе; сепак нашите ракописи кои ги поседуваме никој (освен самиот Господ) не може да ги направи општи, ниту пак некоја недостојна личност може да не лиши од нив. Ние тајно ќе ја помогнеме оваа голема цел, онака како ќе допушти или спречи Бог. Зашто нашиот Бог не е слеп како Паганската Фортуна, ами е Украс на Црквите и слава на Храмот.

Нашата Филозофија не е нова Инвенција, ами е иста таква каква што ја прими Адам и каква што ја користеја Мојсие и Соломон; исто така не треба во нејзе некој да се сомнева или да и се спротивставуваат мислења или значења; но гледајќи дека вистината е мирна, кратка и секогаш иста во сите работи, а посебно е усогласена со Исус in omni parte и со сите членови. И како што тој е вистинска Слика на Таткото, така и таа е негова Слика; нема да се каже тоа е вистина според Филозофијата, туку вистинито е според Теологијата; И онаму каде Платон, Аристотел, Питагора и другите успеаја и каде Енох, Аврам, Мојсие, Соломон се издигнаа; особено онаму каде таа чудесна книга Библијата се согласува. Сето тоа се одвива истовремено, прави Сфера или Топка, чии вкупни делови се подеднакво оддалечени од Центарот како што овде појасно и поопширно ќе се говори на Христијанската Конференција.

А сега што се однесува (главно во ова наше време) на безбожното и проколнатото правење на Злато кое има стекнато популарност и со помош на тоа многу вагабонти и пакосни луѓе прават големи злодела, измамуваат и ја злоупотребуваат дадената доверба; да, во денешно време луѓето кои живеат во дискреција ја сметаат трансмутацијата на Металите како највисоко достигнување и врв на Филозофијата; тоа е цел на сите нивни намери и желби и сметаат дека Бог ќе биде повеќе ценет и величан од оној човек кој може да натрупа повеќе Злато и тоа во изобилие, а кое нешто мислат да го постигнат со ненамерна молитва кај сезнајниот Бог, истражувачот на сите срца; сега ние јавно сведочиме дека вистинските Филозофи имаат сосема поинакво мислење и го сметаат правењето на Злато за играчка зашто покрај тоа тие имаат илјада подобри работи.

Заедно со нашиот мил Татко R.C.C. велиме Phy: aureum nisi quantum aurum, зашто за нив целата природа е откриена: не се радува оној што може Злато да прави и како што рече Христос, што му се ѓаволите послушни, туку оној што му е мило кога Небото се отвора и ги гледа Ангелите Божји како се качуваат и спуштаат, а неговото име е запишано во книгата на животот. Исто така, сведочиме дека под името Chymia се појавија многу книги и слики кои се испратени in Contumeliam gloriae Dei, кои ќе ги наведеме во свое време, а на оние со чисто срце ќе им дадеме Каталог или Регистар. И се молиме сите учени луѓе да обратат внимание на овие видови на Книги; зашто непријателот никогаш не спие и го сее својот плевел се дури посилниот не го искорне. Така според волјата и намислата на Fra: C.R.C ние неговите браќа бараме повторно сите учени во Европа, кои ќе ја прочитаат (испратена на пет јазици) оваа наша Famam и Confessionem и ако им се допадне промислено да навлезат во оваа наша понуда и да ги испитаат најдетално и најискрено нивните Науки, да го разгледаат сегашново време со сета грижливост и да го изјаснат својот став или Cummunicate consilio или singulatum преку Печат.

Во денешно време иако не ги спомнуваме нашите имиња или состаноци, сепак сечие мислење сигурно ќе дојде во наши раце без оглед на кој јазик е; а ќе успее и оној кој го дал само името свое на некој од нас, или писмено или усно или на друг начин. А ова го тврдиме како Вистина, дека секој што искрено од се срце ни е наклонет тоа ќе му се одрази благодетно за неговите добра, тело и душа; но оние што имаат лошо срце или кои се алчни за богатства, тие прво на никој начин нема да можат да не повредат само можат да се доведат до потполно уништување и пропаст. Нашата куќа (иако сто илјади луѓе ја имаат многу одблизу видено) ќе остане засекогаш недопрена, неуништена и скриена за злобниот свет, sub umbra alarum tuarum Jehova.

Back To Top